Nungak Sui Men Par le The Chinland Post Online in Chikkhat

Photo: Chin Dress & Fashion/Fb

Biaruahtu_ Salai Josephbawi

TCP: Na konglam tlawmpal, na sianginn kaimi, kainak kong na kan chim kho hnga maw?
SMP: Ka min cu Rhoda Sui Men Par, Ka pa Pu Ceu Or le ka nu Pi Dawr Doi, chuahpi unau pali lak ah upa bik ka si. Hakha Cherry sang ah kan um. Ka sianginn kainak cu Cinthlaknak lei Sianghleirun (Agricultural University), Naypidaw ah a kumthumnak ka kai cuahmah lio a si.

TCP: Na huammi(Hobby) theih kan duh ko?
SMP: Ca rel, Khualtlawn le cun mirh le nih (smile, Laugh) 

TCP: Atulio Japan ah study trip kal lio a si tiah kan in theih. Zei bantuk dirhmun in dah na va kal i zeidah nan va cawn/zohbikmi a si?
SMP:Aw si.... Japan International Cooperation Centre (JICE) hohatnak in tuahmi Japan le Nichuah Asia Siangngakchia le Mino pawl I Pehtlainak ENESYS 2.0 (Japan-East Asia Network of Exchange for Students and Youths) khualtlawn ah ka va kal a si. Hi riantuannak hi 2007 kum in Japan a cozah nih khualtlawng minung tampi kan ram lut seh tiah Asia ram mino le Siangngakchia pawl kha an ram ah lenvah dingin a sawm lengmang nak hna a si.Asia ramchung le athangcho cangmi ram 14 leng kai a si. Avoi (10)nak Kawlram minung a kalmi lak ah Chin aiawh in ka va tel ve.  A biapi kan zoh mi kan cawn mi cu an mah Japan miphun i an nunphung ( Culture and Arts) lei va hlathlai khi a si. Cun, kan mah lei zong nih kan miphun nunphung cio kong kha theihter chimphuannak (presentation) kan ngeih piak ve hna. An nunphung kan theih khawh deuh nak dingah Edo Tokyo Museum, Zenko-ji Temple hna ah an kan kal pi. Cu lawng lo in Hakuba village ah Homestay an ti i an mah miphun chungkhar sin ah nihnih chung chungkhar tak bantuk in khua kan sa qi hna.  An nunphung, nunning le an thil ti khawh ning pawl hmuhter khawhmi poah cu an kan zohter dih ko.

TCP: Hi bantuk nak kal thawng in na hmuhtonmi na kan chim kho lai maw?
SMP: Ka hmuh ton mi thil tampi lak ah annih an ram cu Nunphung hi an sunhsak tuk. Museum ngan pipi an i ngeih i mah ah cun a hlan lio pi i ramhar an si lio tiang an hmanmi an nunphung, tu tiang an hman mi an nunphung tling tein an chiah i ramdang khualtlawng (Tourists) pawl zong nih theih khun le hngalh khun an duh.Mah ca'h an ram hi mi lut chuak zg an tam i ram tha, ram thangcho ah an i chuah nak pakhat si ti in ka hmuh. An khua a thianghlim ning le thingkung ramkung a tam tuk mi hrim nih hin an ram pawl zei tluk an lung aa khat ti mi zg khi a langh ter.

TCP: Chin miphun zong nih icawn awk a si ve tiah na ruahmi?
SMP: Kan ram a thangcho chin nak ding ah hin cun kan nunphung dihlak kan sunhsak ding hi a biapi pakhat ah ka ruah. Nunphung langh ter kho tu hmunhma hna khi tha tuk in ngei uh sih law kan khua, kan ram hi hmai a fong chinchin kho lai tiah ka ruah. Ram dang mi dirhmun sining kan phan kho te ko lai ti'n ruahchan nak ka ngei.

TCP: Nunphung athancho khawhnak caah Japan cozah nih zeitluk dah a bawmh I Japan mizapi nih tluk in dah an cawlcangh ve? Kanmah teh zeitin dah kan cawlcangh ve a herh tiah na ruah?
SMP: A bik in nunphung thancho nak cu Japan cozah nih a tuah piak ko hna...An mah an ram chung mi tu nih cozah tuah cia mi kha kilven khawh chin an i zuam. An pahnih an i bawm khan khi a si ko. Kan ram zong ah hin cozah nih thok piak ah hin cun a tha bik a si ko. sifak ram kan si tik ah kan mah mipi in dirh hmasa ding hi a fawi tuk lai lo tiah ka
ruah. Asinain, cozah nih a kan tuah piak khawh a si tu ah cun kan mah cung bikah rian a um ko. Kan nunphung thancho ding ah cun a um cia hmanh kha tha chinchin in a kil veng tu, sersiam tu si ve kan herh.

TCP : Laimi hi teh Nunphung athancho khawhlonak aruang tiah na ruahmi le hmailei nunphung kongah na saduhthahmi?
SMP: Kan nunphung a taap pah nak a ruang cu miphun dang lei hruk aih,um tu hoihher tiang zong in kan i cawn pah ruang ah a si ti'n ka hmuh. Lainu kan si cun hmailei ca'h Lailaam hna mi tiang a chim kho tu ding in kan thiam a herh. Kan lai thuam zong miphun lak ah a cuang bik tawn a si bang in pipu nih sersiam cia keneh thlau lo te'n kan i hrukaih ve a hau ti'n ka hmuh. Lai ca hna zong kan thiam hrim a herh.

TCP:  hmailei Chin mino/miphun nih kan ram nunphung thanchonak caaah
ituah ve seh tiah na duhmi?
SMP: Keimah zong fimnak cawng lio mi ka si bantuk in thiam hlei mi ka ngei lo. Ka duh mi cu kan nunphung a hram kan feh ter khawh ding hi a si. Minung pakhat cio nih rian kan ngei ti kan hngalh peng ah cun hmailei caan zong ah kan kilven khawh chin ko lai tiah ruahchan nak ka ngei.Miphun dang nunphung chung lut tuk lo in mah nunphung te ah kan
diriam khawh a herh fawn tiah ka ruah. Kan ram in a chuak i a um cia thil han hi a hrawk chin tu si lo in tha chinchin in sersiam kho tu nusal, pasal tha si i zuam usih timi hi a dongh nak bik ka saduhthah a si.